Myitgyina Ah PDF Pakhat Tlaih A Tong! +

Myitgyina Ah PDF Pakhat Tlaih A Tong!: Kachin ramkulh Myitgyina Panmati(ပမ္မတီး) sang chuahnak hauka ah KIA in training a dih mi PDF pakhat cu nihin (July 14) chun Sml 12 hrawng ah tlaih a tong, tiah theih a si.

“Tlaih a tong mipa cu Myitgyina khuapi hauka ah an tlaih i, dalan nih thawng pek ruangah a si lai, tiah zumh a si. Ralkap nih nih lampi cu an kham caah a mawṭaw he kir awk a ṭha ti lo,” tiah mittu thawnglatu pakhat nih a chim. Tlaih a tong mi pa cu kum 27 hrawng a si i, meithal zun 8 le kuan 1000 pinah pumpak mawṭaw he an tlaih, tiah theih a si.

Sagaing Ramṭhen Banmauk Peng Kahdohnak Ah SAC Ralkap 5 An Thi, A Nung In 5 Tlaih An Tong! A luancia June 28 ah Sagaing ramṭhen Banmauk peng KIA, PDF phufonh le SAC ralkap kahdohnak ruangah SAC ralkap 5 an thi i, minung 5 cu an nung in tlaih an si, cu lengah hriamthil zong kan tlaih, tiah Banmauk Revolution – BR nih phungning tein cathanh an chuah.

June 28 zaanlei le June 29 zinglei ah Simaw(စီးမော်) – TawngKyi(သောင်ကြီး) pawng ah SAC ralkap le KIA, Kata battalion 2(Banmauk PDF, Inndaw PDF), tualchung hriamtlai phufonh kar kahdohnak a chuak i SAC ralkap 5 an thi, 5 cu an nun bu in tlaih an si. Tlaihkhih a tongmi SAC ralkap hna cu ṭha tein an zohkhenh hna, tiah theih a si. The Chin Post