Monywa-Mandalay Lam Ah Khualtlawng Mawtaw Kah An Tong I Khualtlawng Mi 2 An ThiMonywa-Mandalay Lam Ah Khualtlawng Mawtaw Kah An Tong I Khualtlawng Mi 2 An Thi!: Nihin (July 15) chun Sml 12:30 hrawng ah Sagaing ramṭhen Sagaing pengkomh Myinmu peng Kyopintae(ဂွေးပင်တော) khua pawng Monywa-Mandalay mawṭaw lam ah khualtlawng mawṭaw pakhat nih bomb a rial sual lengah meithal in kah an ton caah khualtlawng mi 2 an thi i, 2 hliam an tuar, tiah Myinmu peng mi bawmchantu phu sin in theih a si.
”Cu thil a cannak hmun cu mengtung 57 le 58 kar ah a si. Mawṭaw cu bomb nih a puah i, cu hnu ah mawṭaw cu meithal in kah a si i Maung Wai Phyo Aung (မောင်ဝေဖြိုးအောင်) kum 17 le Ma Kyi Phyo Win(မကြည်ဖြူဝင်း) kum 20 cu kuan hliamhma in an thi. Cun, U Myo Ngunh(ဦးမျိုးညွှန့်) le Ko Aung Zaw Min(ကိုအောင်ဇော်မင်း) hliam an tuar,” tiah mibawmchantu nih cun a chim.
July 11 zong ahkhan Chaung U peng Khin Mon(ခင်မွန်) khua pawng Monywa-Mandalay lam ah bomb lung 4 nih khualtlawng mawṭaw a puah hna caah minung 1 a thi i, minung 12 hliam an tuar.
July 12 zinglei zong ahkhan Bawce(ဘောကျေး) khua pawng Shwebo-Myitgyina lam ah Bus (မှန်လုံ) pakhat nih bomb a rial sual caah khualtlawng mi 1 a thi i, 8 hliam an rak tuar.
Leave a Reply