Magway Ah Mahle Khua Cio Runvennak Ah PDF Nih Khuami Pawl Cu Raltuk Ningcang An Chimh Hna!

 10 August 2022 : SAC ralkap nih thazaang tampi hmang in an cawlcanghnak Magway ramṭhen chung ah khua cheukhat in minung 50 cu mahle khua runvennak ding ah tiah PDF-Magway hruainak in Basic military knowledge cawnnak an ngei, tiah theih a si. Tutan cawnnak hi a voi 9 nak a si i, nihin August 10 in an thawk. Ni 20 chung cawnnak ngeih si lai i, August 30 ah an dih lai, tiah People Defense Force-Magway in ṭaṭ-yin-hmu, Bu Tait Htun nih a chim.

“Ni 20 chung training pek an si lai i, training petu hna cu KIA Laiza headquarters le KNU in cawnpiaktu i fonh in an si lai,” tiah a chim. A luancia a voi 8 nak training a dihmi hna zong, thla 3 chung cawnmi training chimh an si ṭhan lai, tiah Bu Tait Htun nih a chim. Training a voi khat nak in a voi 8 nak tiang a kaimi ralkap hi, nu he pa he an dihlak ah minung 300 leng an si cang, tiah theih a si.

Shweku Peng Rallam A Sialtu SAC Ralkap Cu PDF Nih Bomb An Puahhnawh Hna I, Ralkap 6 An Thi: Kachin ramkulh, Bhamo pengkomh, Shweko peng Kyauktalung(ကျောက်တလုံး) khuachak lei ah rallam a sialtu SAC ralkap hna cu nihin August 10, zinglei suimilam 4:30 hrawng ah PDF nih bomb an puahhnawh hna caah SAC ralkap lei ralbawi 3 telh in minung 6 an thi, 10 hrawng cu fak ngai in hliamhma an tuar, tiah Myo Hla PDF nih cathanh an chuah.

SAC ralkap ṭaṭ-mah 88 kuttang um, khah-mah-yiah 415 le khah-lah-yiah 10 in ralkap 75 hrawng nih ralvennak le hmunhma thianhhlimhnak an tuah lio ah, Kyauktalung (ကျောက်တလုံး) khua chaklei in PDF nih bomb puahhnawh hna, tiah theih a si.

SAC ralkap lei a thimi hna chung in ralbawi 3 an i tel i, ralkap pawl ruak cu an khangh lio ah khuami cheukhat cu ralphaw ah an tlaih hna i, an pawngkam ah an ṭhutter hna, tiah Myo Hla PDF nih an thanh.a rel tu nan dih lak cung ah kan i lawm