KyaikHtu Peng Ah SAC Ralkap Motor Panga Cu KNLA Ṭangṭi Phu Nih An Kah Caah Pahnih A Kaang

KyaikHtu Peng Ah SAC Ralkap Motor Panga Cu KNLA Ṭangṭi Phu Nih An Kah Caah Pahnih A Kaang. Mon ramkulh, KyaikHtu(ကျိုက်ထို) peng AngKaBu(အင်္ဂဘို) khua pawng ah SAC ralkap hriamnam, zen-kuan le datsi phortu motor panga cu KNLA ṭangṭi phu le ThaTone pengkomh PDF Battalion 3 nih nihin July 2 zing sml 8:49 hrawng ah an kah i, motor pahnih a kaang, tiah ThaTone pengkomh PDF Battalion 3 nih cathanh an chuah.

“Nihin zing ah KyaikHtu peng AngKaBu khua ah SAC ralkap motor 5 cu, bomb in kan puah. A thimi an um le um lo kan thei rih lo. A pahnihnak motor nih hriamnam a phorh, a hnu bik motor nih datsi a phorh,” tiah KNLA Battalion 1 nih an langhter.

Hriamnam le datsi phormi motor cu atu lio kahdohnak a zualnak KNU Brigade 6 hmunram UKaRitHta camp ah a kal ding a si, tiah ThaTone PDF Battalion 3 nih an chim. Kahdohnak ah motor pahnih a kaang. Zing sml 10:40 hrawng ah SAC ralkap nih, kahdohnak a chuahnak hmun pawngkam cu hriamngan in an kah thluahmah. KNLA ṭangṭi phu lei in a thimi le aa hliammi an um lo, tiah theih a si. Credit : The Chin Post

Be the first to comment

Leave a Reply

Your email address will not be published.


*