Bago ramṭhen, Pyi khua ah kum 3 tluk ngakchia nute cu a hringtu nu nih nizan August 28 zanlei sml 3:00 hrawng ah Nawaday(နဝဒေး) hlei cung in Ayeyarwaddy tiva ah a zuanpi, tiah tualchung mi hna nih an chim. Hlei cung in a zuangmi hna hi Khittatar(ခတ်ေတရာ) khua thar, No.12 lam ah a ummi kum 23 tluk Ih Way Htun le kum 3 tluk a fanu Hnin Yedi Maung an si, tiah theih a si.
Pyi khuami pakhat nih cun, “Zanlei sml 3:00 hrawng ah an nufa in cycle in an kal i, Nawaday hlei check gate an phak ah palik pawl cu ka fate a dam lo a ti hna i an check hna lo. Nawaday hlei tung 2 le tung 3 karah an cycle cu an chiah i, Ayeyarwaddy tiva ah an zuang. Zei ruangah dah an zuan hi kan hngal lo,” tiah a chim.
An zuan dih in palik nih hlei cung in an zoh hna tik ah ngakchia nu cu ti cung ah a vuan i, a nu belte cu ti chung ah a tla cang, tiah a chim chap. An nufa in an ruak cu mi bawmchantu phu nih an kawl len ko hna nain an hmu kho rih hna lo, tiah theih a si.
Pin Oo Lwin Khua Helnak Lam Ah Motor Pah Sualnak In Minung 9 An Nunnak A Liam!: Mandalay ramṭhen, Pin Oo Lwin khua helnak lam ah nizan August 28 zan sml 8:00 ah motor ngan(ke 22 ngei) le thiri phormi motor pakhat cu an i pah sual ruangah minung 9 an thi, tiah Tantitukha(သန္တိသုခ) mi bawmchantu phu sinin theih a si. A thimi hna cu Myinbu le Aunglan khua lei mi an si, tiah theih a si.
“A thimi hna cu pa 6 le nu 3 an si i, Laukkaing(လောက်ကိုင်) lei ah rianṭuan ding in a kalmi an si,” tiah Tantitukha bawmchantu phu nih an chim. Credit : The Chin Post
Leave a Reply