KNU Hmunram, Mone Peng Ah KNLA Nih SAC Ralkap Camp 5 An Laak!

KNU Hmunram, Mone Peng Ah KNLA Nih SAC Ralkap Camp 5 An Laak!: Karen National Union(KNU) nih an uknak hmunram, Ngaunglaypin(ဆညာင်လေးပင်) pengkomh, Mone(မုန်း) peng ah Karen National Liberation Army(KNLA) brigade 3 nih SAC ralkap camp cheukhat kan laak khawh tiah nihin July 3 ah thawng an thanh. July 2 zinglei ah Mone peng i SAC ralkap camp a si mi Kyaungpya(ကြောင်ပြာ), Aunglaungsein(အောင်းလောင်းစိန်), Kyonpinseih(ကျွန်းပင်ဆိပ်), Kawhpin(ကော့ပြင်း) le Kyaungsuh(ကျောင်းစု) camp hnu cu kan laak khawh, tiah KNU nih an thawngthanhnak ah an langhter.

KNU nih an laak mi camp hna cu tualchung mipi an umkalnak ah dawnkhantu an si i SAC ralkap nih cuka hmunhma pawl cu an uk peng nak hmun a si. Kahdohnak ah SAC ralkap lei in pyithusit(ပြည်သူ့စစ်) 4 an thi i, a dang cu an zaam dih, meithal le zenkuan zeimawzat zong laak a si tiah KNU nih an thanh.

Camp zohfelnak tuah a si lio ah SAC ralkap nih vanlawng le helicopter in an kah hna i khuami a zaamnak hmun zong i hmuitinh in an kah ruangah chungkhar minung 4 an nunnak liam, tiah KNU nih an cathanh ah an langhter chih.

June Thlachung SAC Ralkap Le KNLA Kahdohnak SAC Ralkap 94 An Thi: Karen National Union (KNU) brigade 5 hmunram, Phapun pengkomh chung ah hmunhma rilonh in a lutmi SAC ralkap, BGF le Karen Natinal Liberation Army(KNLA) brigade 5 kuttang um battalion hna cu June 1 in June 30 tiang (thlakhat chung) ah voi 223 an i kap i, cu kahdohnak ah cun SAC ralkap le BGF 94 an thih lengah ralkap 55 hliamhma an tuar tiah KNU brigade 5 nih an thanh.

KNU nih SAC ralkap lei a thimi cazin an fehter ning ah ralbawi pakhat le commander pakhat an i tel. Hliamhma tuarmi hna chung in Major 2 an i tel, tiah KNU brigade 5 nih an thanh chih.

Kahdohnak chung ah SAC ralkap motor pakhat hrawh a si lengah riahcaw le thilri phorhnak ah an hmanmi Rang le La 13 thahpiak an si, tiah theih a si. Thlakhat chung kahdohnak ah KNLA brigade 5 in minung pakhat nunnak liam i minung 6 hliamhma an tuar. SAC ralkap nih khuachung ah hriamngan an kah caah sualnak ngei lo minung 3 hliam an tuar, tiah KNU brigade 5 nih an langhter. Credit : The Chin Post