| 8 August 2022 : KNU hmunram in July, 2022 chung ah kahdohnak voi 259 a chuak. Kahdohnak ah SAC ralkap lei 386 an thi i, 280 hliamhma an tuar, tiah KNU nih nihin August 8 ah cathanh an chuah. KNU hmunram chung ah SAC ralkap, an kuttang ummi ramri hngak BGF le KNLA, KNDO kar ah nitin ngawt in kahdohnak a chuak.
SAC ralkap nih KNU hmunram chung ah SAC ralkap nih cawlcanghnak an tuah ruang ah le tualchung mi hna cung ah nuhrin covo phung an buar ruang ah kahdohnak hi a chuak, tiah an cathanh ah cun an langhter.
KNU brigade 1, Tathon(သထုံ) pengkomh in July thlachung ah SAC ralkap he voi 25 an i kap i, cu kahdohnak chung ah cun SAC ralkap 24 an thi, 45 hliamhma an tuar i, SAC ralkap motor 8 kan hrawh, tiah an langhter.
Kahdohnak chung ah tualchung mi 2 an nunnak a liam i, 3 hliamhma an tuar. Kahdohnak ruang ah Thaton (သထုံ), Kyaikto(ကျိုက်ထို), Bilin le Hpa-an pengchung in tualchung mi sing khat reng lo ralzaam dirhmun an phan, tiah an thanhmi ah an langhter chih.
KNU brigade 2, Taungoo(တောင်ငူ) pengkomh in July thlachung ah kahdohnak voi 33 a chuak. Cu kahdohnak chung ah SAC ralkap 87 an thi i, 15 hliamhma an tuar. SAC ralkap motor 2 kan hrawh, tiah an langhter. Taungoo (တောင်ငူ) pengkomh ah SAC khah-mah-yiah 581 nih an hmanhmi bomb i lamhsualnak ruang ah tualchung mi pakhat nunnak liam i, 2 hliamhma an tuar.
Brigade 3, Ngaunglaypin(ညောင်လေးပင်) pengkomh in July thlachung ah kahdohnak voi 42 a chuak. SAC ralkap 74 an thi i, 59 nak tlawm lo hliamhma an pu. SAC ralkap motor 6 an hrawhpiak hna. SAC ralkap nih van lei kahdohnak voi 7 an tuah caah tualchung mi pakhat nunnak liam, 6 hliam an pu i, SAC ralkap hriamngan kahnak ruang ah tualchung mi pakhat nunnak liam, 5 hliamhma an tuar, tiah an langhter.
SAC ralkap nih Ngaunglaypin (ညောင်လေးပင်) pengkomh chung ah khuami 8 an thah hna leng ah minung 39 an tlaih hna i, inn 22 an khanghpiak hna leng ah inn 7 an hrawh chap.
Brigade 4, Htawai pengkomh ah kahdohnak voi 14 a chuak. cu kahdohnak chung ah cun SAC ralkap 31 an thi i, 40 hliam an tuar. SAC ralkap nih tualchung mi 2 an thah hna leng ah minung 9 cu ralphaw ah an tlaih hna.
KNU brigade 5, Mutraw pengkomh in July thlachung ah kahdohnak voi 110 a chuak, cu chung ah SAC ralkap 95 an thi i, 55 hliamhma an tuar. SAC ralkap motor pakhat an hrawhpiak. SAC ralkap hriamngan kahnak ruang ah tualchung mi 2 nunnak a liam i 5 hliamhma an tuar, Biakinn telh in khuachung inn cu 4 SAC ralkap nih an hrawhpiak hna.
Brigade 6, Doepalaya(ဒူပလာယာ) pengkomh chung ah kahdohnak voi 35 a chuak, SAC ralkap 75 an thi i, 71 hliamhma an tuar. SAC ralkap hriamngan kahnak ruang ah tualchung mi pahnih hliamhma an tuar i, inn 10 a rawk tiah theih a si.
July thlachung in KNU hmunram chung i a cang mi kahdohnak ruang ah KNU kuttang um ralkap 12 an nunnak a liam, 26 hliamhma an tuar, tiah KNU nih cun an thanh. KNU brigade hmunram chung dihlak ah a cangmi kahdohnak ruang ah tualchung mi 19 an nunnak a liam i, 26 hliamhma an tuar, tiah KNU nih nihin August 8 ah cathanh an chuah. Credit : The Chin Post
Leave a Reply