Karenni Ramchung i Ni 5 Chung Kahdohnak Ah SAC Ralkap 23 An Thi!: Karenni ramchung i ni 5 chung kahdohnak ah SAC ralkap 23 an thi, tiah Karenni Nationalities Defence Force (KNDF) nih nihin July 22 ah cathanh an chuah. A luancia July 16 ahkhan Pharuso(ဖရူဆို) no. 44, SAC ralkap sianginn in Dawlawkhu(ဒေါလောခူ) khua lei ah a kalmi SAC ralkap 4 cu, KNDF B-15 le Karenni Army(KA) nih an kah hna caah SAC ralkap pakhat a thi i, meithal pakhat an laak khawh tiah theih a si.
July 16 ṭhiam, zaanlei suimilam 6:00 hrawng ah Demoso peng, Ukhuri(အူးခူရီး) khuachung i umhmun khuarmi SAC ralkap hna cu KNDF/BO1, BO5 le KA nih an kah hna i, minutes 30 hrawng kahdohnak a chuah hnu ah SAC ralkap 3 an thi.
July 18 ah Demoso peng Taesulay(သေးဆူလဲ) khuachung ah umhmun khuarmi SAC ralkap hna cu KNDF BO5 le BO6 nih an kah ṭhan hna i, SAC ralkap 2 an thi. July 18 vek, zinglei suimilam 5:00 hrawng ah Phekhon peng Mubae SAC ralkap khah-mah-yiah 422 battalion cu KA, KNDF BO3 le KNDF B11 nih an kah hna i, kahdohnak suimilam pakhat hrawng chung ah SAC ralkap 3 an thi, tiah theih a si.
SAC ralkap nih Mubae, Puai Kung Tung (ပွဲကုန်းသုံး) sangchung RC Biakinn chung ah a ummi Biaknak lei hruaitu le ngakchia hna cu an tlaih hna, tiah an cathanh ah cun an langhter fawn.
July 18 Chunhnu suimilam 1:00 hrawng ah KA, Phekhon PDF, Mubae PDF, KNDF BO3 le BO4 phufonh nih Biakinn ah umhmun khuarmi SAC ralkap hna cu an kah hna i SAC ralkap 4 an thi, tiah theih a si.
July 21 ah Phekhon nichuah lei Lahay(လဟယ်) SAC ralkap sakhan cu Phekhon PDF, KNDF B03, B02 le B11 phufonh nih an kah hna i SAC ralkap 9 an rak thi. Cun, Warisupahlaing (ဝါရီဆူပလှိုင်) khua pawng kahdohnak ah SAC ralkap pakhat a thi ṭhan.
SAC ralkap hna nih cun kahdohnak a chuah lonak Demoso peng khua hna cu nifatin ngawt hriamngan in an kah leng ah, Mubae le Phekhun kar hrawng kahdohnak ah SAC ralkap hmanmi hriamngan kuan cu khuachung ah an tla i, tualchung mi hliamhma tuar zong an um. Cupinah inn zeimawzat zong an rawk, tiah an theih a si. Credit : The Chin Post
Leave a Reply