Shan-Karenni ramri Loilinlay khua um, tualchung ralzaam hna an umnak hmun cu SAC ralkap nih Jet Fighter in bomb a thlak caah ralzaam siangngakchia hna cu khor chung ah an i thup, tiah Free Burma Rangers nih cathanh an chuah. Loilinlay peng Dawpapa(ဒေါပါပါး) khua cu a luancia August 8 le 9 ah kahdohnak zeihmanh um loin SAC ralkap nih Jet Fighter in voi thum bomb an thlak, tiah theih a si.
Free Burma Rangers nih an langhtermi muicawl ah siangniamrun a cawngmi ngakchia pawl cu khor chung an i thup pah in thla an cam lio ah Jet Fighter nih bomb a thlak thawng zong theih khawh a si.
Tualchung mi an umnak khua chungah SAC ralkap nih bomb an thlak caah a zaam kho lomi kum 70 tluk tar pa pakhat a nunnak a liam i, pahnih hliamhma an pu, tiah tualchung mi hna nih an chim. Credit : The Chin Post
thawngpang dang relchap : FBI nih Trump an Hlathlaimi kong GOP Palai nih Tamdeuh in Theih an Duh
=========================================================
Republican palai pawl nih hin an President hlun hi an tanh peng rih caah le, a inn an luhhnawh i capar an kawlmi kongah lunghrimhnak an ngeih peng rih caah, hi kong he pehtlaiin in thawngpang thamdeuh in theih kan duh, tiin Sunday ah khan DOJ sinah an duhnak an langhter, tiah theih a si.
Trump lila zong nih a inn i kawlhawlnak an tuahmi cu a sual a phawt ngai i, ‘American ziaza a si lo, mah taitai in tuah phung a si lo, luhhnawh taimai zong a herh lo, tiin a chim. Trump biachimmi cu Republican cheukhat nih an i zawng ve i, DOJ cawlcangh ning hi remkhel muisam a keng cang, tiin an ti. Cu ve rualrual in, a tangmi nih cun capar an kawlhawlnak a ruangbik theih an duh caah, hi kong ah thawngpang tlingdeuh tein thanh si kho seh, ti an duh ve.
‘A hleihluattuk in’ kawlhawlnak an tuahmi hi thiamcoh khawh le a herhmi thil a si maw, timi he ai pehtlaimi biahalnak tampi AG Garland nih lehnak a tuah a hau, tiah CNN’s State of Union ah Rep. Mike Turner (R-Ohio) nih a chim.
“Duhthim ding dang an i ngeih ko. Remkhel kong i President Biden a dironhtu (rival) president hlun pakhat a si ngengmang mi a inn vung ramh i suimilam 9 chung a inn va thlok dih cu, hramhram in mi in le lo luhhnawh, chuh va timh he ai lo, ti hi nan fiang cio theu lai tiah ka ruah – cu te cu AG Garland nih a hrilhfiah a haul ai” tiin Turner nih a chim.
Friday i an langhtermi capar hna cu phun 11 an si i, a biapimi zung ca lawngte an si. “An hmuhmi capar hna hi an chim ning (min an bunhpiak ning) taitai in biapimi an si le si lo theih a si lo,” tiin Turner nih a lunghrimhnak a langhter.
“Hi capar cazin hi FBI sin in kan hmuh cang. Asinain, zeitluk biapimi capar dah an si, timi kong kan thei lo. Capar hmuh kan duh, tiah Bipartisan in Congress nih an hal,” tiin Turner nih a chim.
Kawlhawlnak kongah tamdeuh in thawngpang theih kan duh. FBI nih kawlhawlnak an tuahmi hi a dikmi karhlannak a si lo, tiin Rep. Michael McCaul (R-Texas) le Arkansas Gov. Asa Hutchinson (R) nih an duhnak an langhter.
Trump nih a ruahnak a chimmi telhchih in, phung kalpitu (law enforcement) thlurh riangmang in biaka in heh ti i mi ngiartau hi kan i ralrin awk a si, tiin CBS ‘Face the Nation” ah McCaul nih a chim.
FBI nih Trump inn an luhhnawhmi hi anmah le an riante an tuan a si, tiin CNN ‘State of Union’ ah Hutchinson nih a chim. Hi kongah biafang um dingin Democrats lei zong nih an duhnak an langhter. A tlau/ai rawkmi capar le biapihla capar pawl cu ‘a tlaumi ca’ timi min bunh in tawlrel dingin Reps. Adram Schiff (D-Calif.), Chair of the House Intelligence Committee le Rep. Carloyn Maloney (D-N-Y), chair of the House Overnight Committee, nih National Intelligence director ca an kuat.
FBI director Christopher Wray hi amah Trump nih rian a khinhmi a si ko nain, Trump nih a rem lo ngaimi pa a si. Kawlhawlnak kan tuah hnu in FBI le DOJ cungah fahnak kan tlunter lai, tiin online in tu le tu tlirhkhonh ka tong, tiin Wray nih a chim.
“Phung tawlreltu hna hrocer an tonmi hi ka lungre a theihmi thil a si zungzal. Mizei cung i na lung a va tlin lo hmanh ah, phung tawlreltu hna cung i thatlonak tuah hi cu a phi a si hrimhrim lo,” tiin a chim.
Trump a inn luhhnawh kongah DOJ nih sualpalhnak a ngei lo. Cucaah, capar an sining theihternak tuah hi a hmanmi karhlannak a si, tiin Marland Gov. Larry Hogan (R) nih ABC ‘This Week’ ah a chim. Asinain a Republican hawi le nih cun inn an luhhnawhnak kongah leh rih lo mi biahalnak tampi a um rih, tiin an ti peng ko rih.
Tutan nan tuahsernak a ruang fiangdeuh in kan fenh u, tiin Hogan nih DOJ a hnek hna. Asinain, Trump tanh rumro le lehrulhnak tuah lawng ai hmawtchitmi a Republican hawi le he cun a dirhmun ai dang ngai.
Trump a inn luhhnawh dingin biachahnak an tuah mi hi fawizang tein kan tuahmi a si lo. An tlaihmi capar thanh dingin le capar an vung laknak cazin zong thanh chih dingin biaceihbawi kan hal, tiah kan hnung zarh ah khan AG Garland nih a chim.
A thlithup in ramdang he pehtlaihnak tuah (Espionage Act) in phung a buar ming kong telhchih in, a dangdang kongkau i buarsomi a ngeihmi ruangah Trump sual a phawtu Republican tlawmte an um ve. Office ka chuahtak hlan tein khan hi capar vialte hi zapi theih in ka thanh ding cangmi an si, tiin Trump nih a chim ko nain, National Archives nih cun cozah ta (a biapimi capar) ah a ruah peng ko rih hna. A sullam cu, a tu bantukin a biapimi capar i ngeih khawhnak nawl hi Trump nih ai ngeih lo. Cun Mar-a-Lago a inn i an hmuhmi a cheukhat capar le bang cu ahohmanh nih mah duh paoh in zapi sin thanh khawhmi capar an si lo, tiah theih a si.
An tlaihmi capar zapi sin thanh a si hnu in, Trump inn an ramhnak a ruang siseh, Trump kongkau i hlathlainak an tuah cuahmahmi kong fiangdeuh thanh dingin tamdeuh GOP nih an duhnak an langhter.
“Hihi cuhlan ah a um ballo thil a si caah, cuhlan i a um bal lo mi fianternak tuah a hau. Hi bantuk hi kan ram tuanbia chungah a um bal hrimhrim lo” tiin CBS ‘Face the Nation’ ah Rep. Brian Fitzpatrick (R-Pa) nih a chim.
Leave a Reply