Good News : Sagaing Ramṭhen, Butalin Peng Palik Sakhan In Ralkap 2 Nih An Hriamnam He CDM An Tuah

Sagaing Ramṭhen, Butalin Peng Palik Sakhan In Ralkap 2 Nih An Hriamnam He CDM An Tuah! Sagaing ramṭhen, Butalin peng, Kutaw(ကူတော်) palik sakhan in SAC ralkap 2 nih September 5 ah khan Donepian(ဒုံးပျံ) Local PDF sin ah meithal 2 he CDM an tuah, tiah theih a si.

CDM a tuahtu SAC ralkap 2 nih cun MA2, MA1 meithal 2, kuan 400, kutcheh bomb lung 5 le bomb hmanh phun lung khat an i put caah Donepian(ဒုံးပျံ) Local PDF nih minung pakhat ah sing 50 veve laksawng an pek hna i, a himnak hmun ah an kalter hna, tiah theih a si. Credit : The Chin Post

thawngpang dang relchap : Ukraine ni chuahlei ah 772 sq miles Ukraine nih kan lak khawh than cang, tiin Zelensky nih a chim.

Kharkiv Hmunhma Ukraine nih an Lak Chap Ukraine ni chuahlei ah 772 sq miles Ukraine nih kan lak khawh than cang, tiin Zelensky nih a chim. Suimilam 24 chungah a tu bangin Ukraine ralkap nih hmunhma a lethnih in an lak khawh than cang. Izyum le Kupiansk khuapi pahnih cu Saturday ah khan Ukraine ralkap nih an luhnawh. Asinain, khuapi pahnih a lenglei zongah kahdohnak a um peng ko rih, tiin UK defense nih an chim.

Kharkiv pengkulh chungum khuapi le khuate 30 hrawng Ukraine nih an lak khawh than cang i, Izyum velcheh i khua le ram tampi zong an kut a phan cang, tiin Ukraine officials nih an chim.

Izyum le Kupiansk in kan ralkap pawl hnung an tolh, tiin Russia defense ministry zong nih fehternak a tuah. Russia a tanhtu nih an ukmi hmun le hma ah kan ralkap pawl an vai fonh than te lai, tiin Russia nih an chim.

Donetsk ralhauka ah thazaang chuah kan duh caah Balaklyia in kan ralkap pawl hnung an tolh, tin Russia nih fehternak a tuah. Kharkiv pengkulh chung khuasa pawl Russia lei ah zam dingin Russia nih rian an khinhmi bawi nih thawngthanhnak a tuah.

Russia ramri i mawtaw tor le cheng Traffic ah an dir ko kha hmanthlak pakhat ah a lang. A hung zammi mipi caah changreu, khualumhnak le siai lei kan chiahpiak ko hna, tiin Russia ramri Belgorod Governor nih a chim.

Ukraine nih fak ngaingai in lehnak an tuahmi nih hin Russia ralkap pawl i humzual kho lo in a chiah hna lawng si lo, anmah Ukraine mipi tampi a lauter hna. Asinain, Ukraine ram i thennga ah thenkhat tluk cu Russia kut ah a um ko rih. Ukraine ral hi khulrang tein a dih kho lai lo, tiah mi tlawmte nih zumhnak an ngei.

Tutan i Ukraine ralkap nih hlawhtlinnak an hmuhmi hi April i Kyiv velcheh i Russia pawl an kir hnu in a picalbikmi hlawhtlinnak pakhat a si. Kupiansk khua hi Russia nih a thilri le riahcaw chanhnak ah a hmanbiknak hmunhma a si. Thlakhat chung can lakin an lak khawhmi Izyum khua hi tutan i Ukraine kut a phak than ah cun, Putin caah cun nihzah paiper khat bantuk a si te lai Russia ralkap unit pakhat a ningpiin an sungh hi WW2 riin tutan hi avoikhatnak bak a si lai, tiin military expert nih a chim.

Tutan i hlawhtlinnak an hmuhmi nih hin Ukraine ralkap nih Russia kut a phanmi a khua le ram pawl lak than khawhnak thazang ai ngeih ko, ti a langhtertu tehte a si. Kyiv zong nih cun Nitlaklei ram pawl ralhriamnam heh tiah bomh a hal peng ko rih hna.

Tutan hlawhtlinnak kan hmuhmi zoh tikah, Nitlaklei ram bomhmi hriamnam he cun hi ral hi khulrangdeuh in kan donghter khawh ko lai, tiin Ukraine foreign minister Dmytro Kuleba nih a chim, Ralhauka tiang kal lo dingin thawnglatu pawl an kham hna. Ral thawngpang cu kanmah Ukraine nih kan uk ko lai, tiin an chim.

Asinain, Russia kut in an lak thanmi hmun le hma a tamdeuh hi ‘puanpar te lawngin an uk’ khawh rih hna, tiin Saturday ah khan UK defense official nih an ruahnak an langhter.

Chaklei khuapi Kherson pawngkam tu ah hin Ukraine pawl an cawlcangh a tha theu lai, tiah International nih cun an ruah ko nain, tutan zarh i lehnak an tuahnak hmunhma cu nichuahlei ah a si. Kherson khuapi kilveng dingin a thawngbikmi a ralkap pawl Russia nih a thlah than hna, tiin analysts nih an zumh.

Ukraine hi nichuahlei i an hlawh a tlin rup in, chaklei zongah an hlawh a tling thiamthiam, tiin official pakhat nih a chim. Chaklei ralhauka ah kilometers 20 lenglo tiang hmai kan nawr khawh cang, tiin Ukraine chaklei command aiawhbiachimtu Nataliya Gumenyuk nih a chim.

Asinain, chaklei ralhauka ah a ummi Russia ralkap pawl hi biataktein an i chirhkanh ve i, Ukraine ralkap pawl zong Russia ralkap sinin lehnak fakpi an tong ve.
Saturday ah khan Rusia nih rocket in Kharkiv khuapi cu a kah i, minung 1 a thi, inn ceilak a hrawh, tiah laihlum officials nih an chim.

Russia nih an ukmi Zaporizhzhia nuclear power plant i a donghnakbik a tangmi Reactor (seh)zong an hmih lawlawng cang caah, electric mei zong a pe ti lo, tiin Ukraine energy regulator Energoatom nih a chim.

Nithum chung cu mei a pek ko nain, a lenglei meitha remh a si hnu in an hmih lawlaw. Lakhruakthil (emergency) a tlun tik i hman awkah kan meitha hi i ret kan hau. Cucaah, kan power plant he ai pehmi meipeknak hmunhma hrawng i bomb thlak hi cu ngol sisehlaw a tha, tiin Ukraine mei petu phu nih an duhnak an langhter.