Falam-Hakha Kar SAC Ralkap Le Tualchung Ralkap Kahdohnak Ah SAC Ralkap 15 Hrawng An Thi

Falam-Hakha Kar SAC Ralkap Le Tualchung Ralkap Kahdohnak Ah SAC Ralkap 15 Hrawng An Thi: Nizaan July 8 ah Falam-Hakha lampi Ṭaal khuapawng ah SAC ralkap le tualchung hriamtlai phu kar kahdohnak a chuak i, cu kahdohnak ah cun SAC ralkap 15 hrawng an thi, tiah tualchung hriamtlai phu hna he naihniam in ummi nih an chim.

Kalaymyo in Laitlang lei ah a kalmi SAC ralkap motor run cu Chin tualchung hriamtlai phu CDF le CNA nih nizaan July 8, chun suimilam 12:00 hrawng ah rak bawh in an kah hna i kaphnih kahdohnak a chuak. Tualchung hriamtlai phu hna nih bomb puahhnawh in le a thli in an kahdoh hna caah SAC ralkap lei a thimi an tam tiah tualchung hriamtlai phu hna he naihniam in ummi nih an chim.

SAC ralkap hna cu June 29 in Kalaymyo in Laitlang lei ah motor 27 he an kai i, CDF, CNA le CNDF nih July thla thok in an kah hna. Rallam a sialtu SAC ralkap hna cu minung thazaang 100 reng lo an si lai, tiah tualchung hriamtlai phu nih an ruahdamh.

Sagaing Ramṭhen Mawlaik Ah SAC Ralkap Bomb Puahhnawh An Tong 8 An Thi: SAC ralkap motor 3 cu nizaan tihni July 7 chunhnu ah Sagaing ramṭhen Mawlaik(မော်လိုက်) ah Mawlaik tualchung hriamtlai phu nih bomb an puahhnawh hna caah SAC ralkap 8 an thi tiah theih a si.

Minung thazaang 100 hrawng nih zulhmi SAC ralkap motor 3 cu WaiDawngh(ဝဲဒေါင့်) thing ah-nak hmun lei an kal lio, lampi ah bomb puahhnawh an tong, tiah tualchung hriamtlai phu in chimphuannak nawlngeitu nih The 74 Media ah a chim.

“A hlankan in thawng kan theih caah an ratnak ding lampi ah bomb kan hmanh, kan hmanhmi bomb lung hnih nih a hliamh hna i, a thimi zat cu SAC ralkap lei he naihniam in a ummi sin in kan theih, 8 an thi i, hliamhma tuar zong an tam,” tiah a chim. SAC ralkap hna nih cun WaiKaTa(ဝဲကသာ) khua inn 2 cu an khangh, tiah a chim chap.

Sagaing ramṭhen Mawlaik(မော်လိုက်) peng ah SAC ralkap le tualchung hriamtlai phu kar atu le tu ti tluk in kahdohnak a chuak. A luancia May 15 zong ahkhan Ṭhawta(ထော်သာ) khuachung um SAC ralkap le pyusawhṭi hna cu tualchung hriamtlai phu nih an kah hna caah ralbawi pakhat le pyusawhṭi 2 an rak thi.

Mawlaik(မော်လိုက်) peng cu Sagaing ramṭhen chung Chindwin tiva nitlaklei ah a ummi a si i, inn 10,000 reng lo le milu 55,000 hrawng an umnak pengkulh a si. Credit : The Chin Post