BREAKING NEWS : Myinmu Peng Kahdohnak Ah SAC Ralkap 15 An Thi, Monywa In A Chuakmi SAC Ralkap Tilawng 2 Kah An Ton Caah An Rawk

BREAKING NEWS-/Myinmu Peng Kahdohnak Ah SAC Ralkap 15 An Thi, Monywa In A Chuakmi SAC Ralkap Tilawng 2 Kah An Ton Caah An Rawk

Sagaing ramṭhen, Myinmu peng ah rallam sialmi SAC ralkap bomb kawl phu le gate hngak pawl cu nizan July 25 ah tualchung PDF nih bomb in kan puahhnawh hna caah SAC ralkap 15 an thi, tiah Black Eagle Defence Force-MMU nih an langhter.

July 25 zing sml 6:21 ah Myinmu khua ah bomb va luah ding in a chuakmi SAC ralkap 20 hrawng cu Guipintaw le Buminkyikin(ဂွေးပင်တောနှင့်ဘိုးမင်းကြီးကင်းကျေးရွာ) khua karah bomb an fim lioah PDF nih bomb in an puahhnawh hna caah SAC ralkap 13 an thi colh i, 7 hliamhma an pu tiah theih a si.

Zing sml 8:30 hrawng ah Buminkyikin khua le Alakapa khua karah sentari cawngmi ralkap 5 hrawng cu PDF nih an hmanhmi bomb cung an dir lioah bomb in an puah hna i SAC ralkap 2 an thi. An hawile dang cu an zaam dih, tiah theih a si.

Cu kahdohnak ah Myinmu Black Eagle Defence Force-MMU nih an hruai hna i, People’s Defence Force Myinmu-MMU PDF၊Myinmu Civil Revolution Force-CRF Myinmu၊ Myinmu Lightning Guerrilla Force le Myaung PDF hna nih an kah hna.

Sagaing ramṭhen, Monywa khua in a chuakmi SAC ralkap tilawng cu MDF special force le MDF thiamhlei phu hna nih July 24 ah an kah hna caah tilawng 2 cu meikhu an chuak i an rawhnak a tam, tiah theih a si.

Tilawng cu Kani peng ah MDF nih 40 mm le hriamhme in an kah hna i, SAC ralkap zong nih an tilawng cu an dirter i 60mm, seh meithal le hriamhme in an kan kah ve, tiah MDF nih cathanh an chuah.