Bangladesh Ah Rohingya Ralzaam Hruaitu Pahnih Meithal Kahthah An Tong!

 10 August 2022 : Bangladesh ram Rohingya ralzaam camp pakhat ah ralzaam hruaitu pahnih cu meithal in kahthah an tong, tiah theih a si.

Abu Taleb Kum 40 le Syed Hossain kum 35 cu Rohingya hriamtlai minung 8 nih an thah hna, tiah Bangladesh Palik in chimphuannak nawlngeitu Kamran Hossain nih AFP ah a chim. Kah a tong mi pahnih cu kah an ton bak in Siizung ah kalpi an si i siizung phak pi hnu ah an thi, a kaptu minung zong kawl cuahmah an si, tiah theih a si.

Rohingya ralzam hruaitu minung pahnih a thattu hna hi Rakhine ram thlanglei ah a cawlcangmi ARSA hriamtlai an si, tiah Rohingya ralzam pakhat nih AFP ah a chim. A luancia thlathum chung zong ah khan Rohingya hruaitu 3 tel in Rohingya mi 5 a rak thattu zong ARSA phu an si, tiah min langhter a duh lo mi Ralzam pahnih nih cun an chim. Rohingya hruaitu pahnih thattu hna kong he pehtlai in Palik lei nih zei thawngpang hmanh an thanh rih lo.