Sagaing Ramṭhen, Kani Peng Ah Nu 7 Cu SAC Ralkap Nih An Tlaihhrem Hna! Sagaing ramṭhen, Kani peng khuate pahnih ah SAC ralkap nih lung lei zawtnak a ngei mi nu pakhat telh in nu 7 cu an tlaihhrem hna, tiah Kani peng dohthlennak ah a cawlcang mi Pyi Aung Naing nih a chim.
August 17 ah khan nu pakhat cu SAC ralkap nih an tlaihhrem i, August 28 ah a dang khuami nu 6 zong an tlaihhrem hna. Sualnak a tuahtu SAC ralkap pawl hi zei Battalion dah an si ti cu hngalh a si lo nain, SAC ralkap angki le ralkap min cazin hna zong tualchung mi hna nih an hmuh, tiah theih a si.
“Humhimnak ca ah khua min cu ka chim lai lo. Ralhrial in an zaam hna lio ah rallam a sialmi SAC ralkap pawl he an i ton caah an tlaihhrem beh hna. Atu hi an ngandamnak ding ah kan zohkhenh cuahmah hna,” tiah Pyi Aung Naing nih a chim.
Khuate pahnih ah tlaihhrem a tongmi nu hna hi kum 30-40 tluk an si. A pahnihnak khuate ah lung lei zawtnak a ngei mi nu pakhat an tlaihhrem pinah nu dang 6 cu a bubu in an tlaihhrem hna, tiah Pyi Aung Naing nih cun a chim.
Kani pengchung ummi Chin Dwin tiva kam khuate cu SAC ralkap nih hriamngan le hriamhme he an kah tuk caah PDF nih hmun 4 li in an bawh hna i, an kah ve hna, tiah theih a si. Credit: The Chin Post
Leave a Reply