Kalaymyo ah zaan lei sang ah damiah an teih hna ii tangkaa ting 10 an fiar. Kalaymyo, Tawngphila sang/veng ah ummi Pu Cinh Deih Lian te inn cu July 30 suimilam 2 le cheu hrawng ah mawtor pa khat in minung pali nih meithal he an luh hnawh hna tiah thawng kan theih.
Thil sining cu hi ti hin a si! Pu Cinh Deih Lian te inn pawng ah mawtor pakhat a dir ii cu mawtor cun Mask aa bunh mi pa pali an rak chuak ii inn chung cun an lut. An mah lak ah pakhat nih meithal aa tleih ii a dang pakhat nih Boom pakhat aa ken tiah kan theih.
Meithal tlai tu pa pakhat nih cun inn ngei tu cu meithal in a ching ii na tangkaa na ngeih mi chuah tiah a hro cer,mah ruang ah inn ngei tu zong nih cun Tahan AG khrihfa bu phaisa 720,000 le an mah an ngeih mi chung in phaisa ting 3 an chuah piak hna pin ah inn chung ii Phone 5 zong an lak chih tiah kan theih. Kawl Ralhrang nih Aa Naa an ting (uknak an lak) hnu ah Kalaymyo ah damiah teih an ton nak a tu a voi khat nak a si.
thawngpang dang relchap : Good News : SAC Ralkap Nih Uknak An Laak Hnu In Karenni Hmunram Kahdohnak Ah SAC Ralkap 1500 Hrawng An Thi
SAC Ralkap Nih Uknak An Laak Hnu In Karenni Hmunram Kahdohnak Ah SAC Ralkap 1500 Hrawng An Thi!: SAC ralkap nih uknak an laak hnu in Karenni hmunram chung kahdohnak ah SAC ralkap 1500 hrawng an thi cang, tiah Progressive Karenni People Force (PKPF) nih cathanh an chuah.
SAC ralkap nih uknak an laak February 1, 2021 in July 31, 2022 tiang Karenni ramkulh chung ah a cangmi kahdohnak, ramkhel lei le nuhrin covo phungbuarnak kong he pehtlai in SAC ralkap tuahsernak cazin cu khawmhsuat in PKPF nih nihin August 1 ah cathanh an chuah.
Karenni hmunram ah 2021, May thla 20 in kahdohnak a chuak i, kumkhat le cheu chung ah kahdohnak voi 390 leng a chuak, tiah an langhter. Cu kahdohnak chung ah cun SAC ralkap 1451 an thi i, SAC ralkap vanlawng 54 a rawk, tiah an langhter. Tualchung hriamtlai phu lei in minung 147 nunnak a liam, tiah an langhter chih.
SAC ralkap nih van lei kahdohnak voi 157 tiang an tuah, tiah PKPF cathanh ah cun a lang i, mizapi hmuitinh in van lei kahdohnak le hriamngan thlakhnawh in kahdohnak an tuah caah mi sawhsawh (civil mi) 255 nunnak a liam cang. Kahdohnak ruangah le SAC ralkap hriamngan kahnak ruangah tualchung mipi a sing reng lo cu ralzaam dirhmun an phan. Ralzaam dirhmun a phan mi hna chung in minung 38 cu an zaamnak hmun ah an nunnak a liam, tiah theih a si.
SAC ralkap nih hriamngan an kahnak ruangah le khuachung innlo an khanghnak ruangah biaknak lei inn 23 le inn 1,100 leng a kaang cang. Tlaihkhih a tongmi zong minung 260 an um, tiah PKPF nih cun ah an langhter chih.
Mandalay Ramṭhen, Yelaykyun Kahdohnak Ah SAC Ralkap 5 An Thi: Mandalay ramṭhen, Mataya(မတ္တရာ) peng Yelaykyun(ရေလယ်ကျွန်း) khua ah umhmun a khuarmi SAC ralkap hna cu July 31, zinglei suimilam 11:00 hrawng ah tualchung hriamtlai phufonh hna nih drone in an kahdoh hna caah SAC ralkap 5 hrawng an thi, tiah BLACK WOLF – PDF nih an thanh.
SAC ralkap hna cu Mataya(မတ်တရာ) pah-kah-phah, Wetlet peng dohthlennak tuahtu phu, Shwebo pengkomh no.18 battalion, Shwebo battalion 5, ṭaṭ-khuai 1 le BLACK WOLF – PDF phufonh nih an kahdoh hna. Kaphnih kahdohnak minutes 20 hrawng a rauh hnu ah SAC ralkap 5 an thi, tiah theih a si. Credit : The Chin Post
Leave a Reply