A Poi TakTak Ee Hitluk Aa Dawh Ko Mi Ralhrang Nih Inn 2000 Hrawng An Khang!

SAC ralkap pawl nih May 2 ah Ayataw(အရာတော်) peng Malayta(မလဲသာ) khua an khangh caah khua ning in a ciam dih, tiah theih a si. Inn 1000 leng a ummi Malayta khua cu Ayataw le Myinmu peng aa pehnak ah a ummi a si. “May 2 zing sml 9:00 hrawng ah kan khua an rak phan, Aho hmanh kan um ti lo, kan zam dih. Chun sml 12:00 hrawng in an khangh i zatuak 90 (90%)cu a kaang dih. SAC ralkap an rak phak hlanah kan zam dih manh i, khuami a thimi kan um lo,” tiah Malayta khuami pa pakhat nih a chim.

SAC ralkap pawl cu 200 hrawng an si i Momywa peng Bawdi ta htaung(ဗောဓိတစ်ထောင်) tlang tiang in rallam an sial, tiah theih a si. Cu rallam a sialmi SAC ralkap pawl nih, Ayataw peng le Myinmu peng karlak khua hna cu mei in an khangh caah Malayta, Kanyin, Ngaungpin(ညောင်ပင်) le Padataing(ပဒတ္ထိုင်း) khuami 10000 leng an zam, tiah theih a si.

Sagaing ramṭhen, Kalay peng thlanglei Ashihshi(အရှေ့စည်း) khua cu SAC ralkap nih, May 1 ah an luhhnawh i inn vialte an khangh dih pin ah khuami 3 zong an thah hna. SAC ralkap umhmun an khuarnak Phungki inn le cacawnnak sianginn ti dah lo cu an khangh dih. Ashihshi khua cu inn 900 leng a umnak khua a si, tiah theih a si. “Inn 900 leng umnak Ashihshi khua cu khuapi ning in SAC ralkap nih an khangh dih. A kang lomi hi inn 3 lawng a si.

Cu leng ah thil mansung a ummi zong an fir dih i Khuami 3 zong an thah hna, aho an si ti cu kan hngal kho lo kan zaam dih, tiah tualchung mi pakhat nih a chim. April 27 ah SAC ralkap pawl cu Ashihshi khua lei ah rallam an rak sial caah kahdohnak a zual i, anmah lei a thimi an tam caah inn vialte an khangh dih nak hi a si. May 3 ah SAC ralkap nih, Helicopter an hman i mizapi ralkap hna cu ngol loin a kah hna, ralzam mi hna zong an kah hna. Ralzam khuami hna cu umṭhutnak le eidin bawmhchanh an herh tuk tiah theih a si.