Press "Enter" to skip to content

LAAMNAK NIH ZEIDAH A CHUAHPI Tiah Dr. Aung Myint Thang Tial Mi Nih MiLaam Pawl Lungtuai In Aum Ter Hna

Bawipa i i lawmh cu Baibal nih a kan fialmi a si. Bawipa i kan i lawmhnak kan i umpi khawh lo i kan laammi cu lunglomh awk ngaingai a si. Asinain Laimi nih Bawipa ah kan i lawm kan ti i biakin chung i kan laammi nih zeidah a chuahpi, vun zoh hna hmanh uh!

Miriam voikhat a laam nak Baibal ah kan hmuh. David voikhat a laam nak Baibal ah kan hmuh. Pumhnak chungah an laam lo. Pumh chiarte an laam lo. Music a tum i an laammi a si lo. Baibal Biakam Thar Cauk chungah Bawipa ah ai lawm mi an tam lengluang nain a laam mi an um lo. Laimi cu Pathian dawtnak hi hawihlei in a thei mi kan si caah Baibal Biakam Thar chung minung, Paul, Mary, Stephen, Peter te nakin Bawipa ah kan i lawmh deuh caah kan laam khi a si hei ti ko usih! Asi cu a si lo nain mu!

  1. Laimi cu laam in kan i thawh i laam ah kan dong lo. Biakin chung i mah tthutnak hmun zawn te i dir i laam in kan rak i thawh. Kan kal vima (developed kan tuah) i mi hmai i chuah i laam ah kan i ttial. Mah tthutnak hmun te i dir i laam kha kan i lungsak kho ti lo i mihmai thengmang te i va laam kha kan uar i kan tuah cang. Hihi 1995 tiang hrawngah Laimi hna an rak laam ning a si.

  1. Mihmai i va chuah i va laam sawhsawh zong cu kan i duh tawk ti fawn lo i mi hmai i nuhe pahe a tlik bak i tlik kha atu cu kan hman cang. Hi mihmai i maratun tlik zuam bantuk i Laimi biakin chung i an tlik hi kum 20 a tling rih lo.

  1. Mi hmai i a tli mi pawl zong nih khan tlik sawhsawh cu an i lunghmuih ti hoi lo i an speaker, evangelist pawl salaam peek pah bu in an laam cang. Acheu nih an kut hna an i sih i an kut an tleir i a tang in thlarau fale ai timi a cheu cu kut in an ser chommi kutka chungah an lut cang.

  1. Evangelist salaam peek le kut kutka sermi tang i luh lawng zong cu an i lungsak ti fawn lo i minung hna an i cit, hri hna in an i hruai cang. Mihmai i sexy taktak i tawttawk hnir laam hna a chuak cang.

  1. Acunglei palinak point i ka ttialmi dirhmun zonghi an i lungsak ti hoi lo i, an i duhtawk ti lo i, rock music le disco music bak kha keyboard in thang taktak in an tum hna i evangelist speaker nih Baibal ah a um bak lomi holhtheihlo hla kha an lih bak in an sak pi hna. Mipi kha zuri laam bak in an laam hna. Cucu a ngan bikmi revival ah an chiah.

  1. Holhtheihlo hla sak i ttul le laam zong cu an i duh tawk ti fawn lo i acheu cu zapi hmai ah an it i rul bantuk hna in an lawn i pakhat le pakhat an tawttawk hna an i beng pah i Pathian an thangtthat. Biakin chung lu/taw binh hna hi Pathian duhmi ah a ruat i ahmang mi an um cang. Cucu Pathian duhmi ah an ruah ko.

  1. Hngakchia no tete Adam sualnak ai hrawn le hrawn lo hmanh a thei rih lo mi, Jesuh nih zeitindah a ka khamh ti hmanh a thei rih lomi hna zong nih an i cawn ve i upa pawl nih an tuahmi kha an tuah ve. Jesuh nih zeitindah a ka khamh ti hmanh a hngal lomi hngakchia cu cu tluk taitai cun Bawipa ah an i lawm kho hnga maw timi hi biahalnak a chuah. Asinain anmah nihcun Thiang Thlarau rianttuannak tthiamtthiam ah an chiah ko.

Laimi cu laam in kan i thawk zongah laam in kan dong lo. Kan kal vima, kan virhkhawh vima i a dongh nak ahcun rul laam in kan laam cang. Lungfim lo zuri hrut laam i laam kha a sang bikmi Thiang Thlarau rianttuannak ah kan chiah cang. Cucaah Jesuh hi atu vawlei ah um rih selaw hitihin bia a chim hnga, “Nannih Laimi cu laam lo tein rak ka thangtthat ko uh” tiah a kan ti ka zumh.

Credit: Aung Myint Thang

Be First to Comment

Leave a Reply

Your email address will not be published. Required fields are marked *