Breaking News : Tamu Ah Ralzaam Pakhat Cu Zohchia Ngai In A Ruak Hmuh A Si

Tamu Ah Ralzaam Pakhat Cu Zohchia Ngai In A Ruak Hmuh A Si!: Tamu peng, Indai (အင်ဒိုင်း) khua ah ralzaam dirhmun a phan i, Tamu ah thilri a zuar tawntu Panta(ပန်းသာ) khua mi U Ngyi Ngyi, kum 33 cu July 31 ahkhan a rak thi cang i, a thih in nihnih a rauh hnu lawng ah a ruak an hmuh tiah theih a si.

Tamu pengchung ah kahdohnak a chuah tawn caah Tamu-Kalay lampi a umkal mi cu i ralring ding in PDF Tamu nih cathanh an rak chuah caah U Ngyi Ngyi cu thil zuar ah motor lampi lei kal lo in, Lo lam lei in a kal, tiah theih a si.

U Ngyi Ngyi a thih hi July 31 hrawng ahkhan a si i, thah a si lai, tiah ruah a si. Tamu in a kirlei ah thah a ton a si kho, tiah a nupi nih a chim. U Ngyi Ngyi nupi nih a chim ning ah cun, “Zaanlei suimilam 5:00 tiang ah kan pa cu inn a phanh lo caah phone in ka chawnh i, lampi a phaknak a ka chimh hnu caan sau a rauh hnu zong ah inn a phak bal lo caah ka chawnh ṭhan. Midang pa aw ka theih hnu ah phone cu an thah, cu ni thawk cun a tlau i, a ruak lawng kan hmuh ṭhan” tiah a chim.

U Ngyi Ngyi ruak ah cun a kut hnulei hriṭem bu in a lu ah meithal kahnak hma hmuh a si, mizei kut in a thih cu theih a si rih lo. A ruak cu Manmaw(မန်မော်) khua pawng ah August 2 ah hmuh a si i, Tamu bawmchantu phu nih Indai(အင်ဒိုင်း) thlan ah an vui. U Ngyi Ngyi nih cun a nupi, fapa pakhat le fanu pakhat a taantak hna, tiah theih a si.

Manmaw(မန်မော်) khua le Panta(ပန်းသာ) khua pawnghrawng cu SAC ralkap le pyusawhṭi an umkalnak lam a si i, Manmaw(မန်မော်) khua le Indai khua cu meng 7 hrawng aa hlat. Credit : The Chin Post

Be the first to comment

Leave a Reply

Your email address will not be published.


*