R.I.P : Pu That Ling, Thantlang Ralzam nih An Kan Thih Tak E

Thantlang khua mi, Mizoram Lawngtlai ah a zaam ve mi Pu That Ling (kum 60) nih LCMC Sizung ah an kan thih tak tiah kan theih. Pu That Ling cu Thantlang khuapi a kaangh hnu, mi zapi zaam an si hnu ah himnak kawl in Mizoram, Lawngtlai ah a zaam ve mi asi.

Nun himnak kawl in Mizoram zaamnak hmun ah an kan liam tak cu thinlung a faak hringhran ko. Pu That Ling a ruak cu a chuah kehnak a rak si mi Bungtlang ah tlun pi ding in timhtuah a si caah Mizoram lei in Saisih Chuak tiang an thlah lai tiah Lawngtlai News nih a langhter.

Kan ram buainak, raldohnak ruang ah minung tampi cu himnak kawl in Mizoram tiang ah kan zaam hna. A si nain kan zaamnak hmun a simi Mizoram ah a thi mi kan um ngai cang. Kan inn le kan lo a si lomi, kan zaamnak le chikhat kan i dor nak hmun ah kan liam than tawn ko hi thinlung nih a celh hrimhrim lo. Nizaan tihni te zong ah Aizawl Sizung le Lawngtlai ah kan Laimi chung in a thi mi kan um cang. Nihin lila zong ah thihnak thawngpang kan theih than hi asi.

Pu That Ling nih a kal tak mi hna, chungkhar cingla rualchan dihlak kan i tuar pi hna, Pathian nih nan tuarnak in hnem hram hna seh.

Leave a Reply

Your email address will not be published. Required fields are marked *