R.I.P : Mizoram Khuabung Khua Ah Chin Mi Pahnih Kar Ah Thahnawnnak A Chuak!

Mizoram Khuabung Khua Ah Chin Mi Pahnih Kar Ah Thahnawnnak A Chuak! Mizoram Khuabung khua ah khuasa mi Falam peng, Hnahthial khuami Hrang Than Ce, kum 40 nih Tedim peng Langzang khuami Ngo Khan Do, kum 42 cu August 13 zaanlei ah sobul in a tuk i a thi, tiah theih a si.

Ngo Khan Do hi Khuabung khua le a kiangkap ah Inn saknak thilri pawl a zuarmi si i, Hrang Than Ce hi khuabung ah thing at mi a si, tiah theih a si. Hrang Than Ce nih Ngo Khan Do cu a lu le a cal ah sobul in a tuk caah a thi, a ruak cu thlalangawng in a hlonh, a thisen pawl cu ti in a ṭawl dih hnu ah khuami sin ah ‘mi ka thah sual caah palik sin ah ka kalpi u’ tiah amah tein aa phuang, tiah theih a si.

Thah a tongmi Ngo Khan Do cu fa 4 ngeimi a si i, a chungkhar cu Tedim ah an um, tiah theih a si. A ruak cu nihin august ni 14 ah a chuahnak hmun Langzang khua ah an tlunpi, tiah theih a si. Hrang Than Ce nih Ngo Khan Do hi zeiruangah dah a thah ti cu fiangin theih a si rih lo nain leiba ruangah bia-alnak an ngei, tiah khuami nih an chim. Credit : The Chin Post

Thawngpang dang relchap : Khuachung thil sining hlathlainak a tuahtu tualchung hriamtlai phu chungtel 5 hna cu August 13 zaanlei ah tlaih an tong

Sagaing ramṭhen, Depeyin peng, Hpoketantaw khua ah tlaih a tongmi tualchung ralkap 5 chung ah ralkap 4 cu SAC ralkap nih an thah hna i, pakhat cu a tlau, tiah tualchung mi nih an chim. Hpoketantaw khua cu August 9 ahkhan SAC ralkap 100 nih luhhnawh in umhmun an khuar.

Khuachung thil sining hlathlainak a tuahtu tualchung hriamtlai phu chungtel 5 hna cu August 13 zaanlei ah tlaih an tong, tiah min langhter a duh lo mi khuami pakhat nih a chim.Khuami pakhat nih cun, “Thah a tongmi cu 4 an si i, an lu ah an tuk hna caah an lu cu zoh awk ṭha lo in an rawk. Fak tuk in an hrem hna hnu in an Kaa ah mei thal in an kah hna. Nihin August 14 zinglei i khuachung kan luh ah an ruak kan hmuh hna,” tiah a chim.

Inn 300 hrawng khuasaknak, Hpoketantaw khuami 800 leng cu a luancia zarh khat hrawng khan hmundang ah kan zaam hna, tiah Hpoketantaw khuami hna nih an chim. Minung zakhat reng lo in rallam a sialtu SAC ralkap hna nih August 2 ahkhan, Depeyin peng khua hna ah lut in khuami 50 reng lo cu an rak tlaih hna, tiah tualchung mi nih an chim.