Press "Enter" to skip to content

Laipa Pakhat A Thilton

Nan kut thiang tein i ṭawl lengmang u ti a si caah kut thuhmi spirit cawk ah nizan kha khua chungah ka va kal ta. Mi an kin tukning hi ninglei a ṭi. Tuk hna a sum thulh. Malaysia kan rak um lio Operasi an luh a thaizing bak a lo. Keimah le keimah aa seihchiah ti lomi ka lo cang, aa phuhrungmi bantuk in ka mit vei tia in ka au ve. Dawr kipah ka lut i spirit nan ngei maw ka ti duahmah hna. A dih an ka ti dih ve. A dih an timi hi an ti sawhsawh lo a fiang ngaite. A ni lai bantuk, a mirh lai bantuk in an um dih i, ka lung an hring chinchin. Cu spirit cu sii dawr kip le eidin dawr kipah a tormi a si tawn ko. Inn ka phanh in kan nu nih, “ eidin dawr kipah facang le arti cawk awk a um ti lo’’ a ka ti hoi. Kan pipu hna nih “pul a tlung” an rak ti tawnmi, “mangṭam a tlung” an rak ti tawnmi le ‘’chun mui a tlung” an rak ti tawnmi vialte pakhat hnu pakhat in ka thinlung mitthlam ah an hong cuang luaimai. Mirang zong hi an rak fim dih ve rua lo. Dawr ngeitu hna nih “hiti hin thil caw hlah u, a dih lai lo” tiah ralrinnak an peek len hna ko bu ah an ngai hlei ve lo. Laimi lau hna seh a timi an lo.

Chikkhat te cu “thih hi Laimi lawng nih kan ṭih lo hi ta’’ timi a hun i fiang ngaimi ka lo. Laimi hi thih a fah zia a tuar thiam bik kan si. Thih thamtham cu zungzal nunnak ah pei kan lan leh lai cu tiah, nuam ngai in kan chim tawn ko. Sihmanhsehlaw, kan thi dih cang lai hih hon ti lioah “nangmah va thi hmasat” hon ti ahcun a duh lo ding lawngte kan si ko. Thih hmasat cu aho nih dah a duh lai i? A hnu bik thih hmanh a duh lo kan tampi men ko lai dahkaw. Pakhat pa thih a ṭih tuk an ti. Ziah hi tluk lawmmam in thih na ṭih an ti i, “ ka hmuh tawnmi pei ka hmuh ti lai lo cu” a ti hna an ti. A si khe ko. Thih cu loh bak khi a si ko cu mu. Loh sawhsawh hmanh a si lo cu. Zeitik hmanh i hmuh ṭhan khawh ti lo dingmi loh khi dawh a si cu mu. Laimi kan mawh lo ka hei ti ko. Norway mi hmanh coronavirus thawngpang chiat ruangah an hun lau ve ciammam taktak cu pam lio i pul a phiarmi ko khi an lo. Eidin dawr kip i eiding le dinding vialte thiangvek in an hun cawk dih cang ahcun Laimi cu a phin bakin kan phing cang.

Norway cozah nih sianginn kip an khar fawn i, zung kip le company ngan deuh paoh an khar dih fawn. Cu lawng hmanh a si lo, minung 20 cung tonnak paoh nan tuah lai lo an ti fawn tikah Khrihfabu kip Biakinn khar a si dih fawn hoi. Cu lawng a si rih hoi lo, inn ah nan um dih lai i, nan chuak nan vak lai lo an ti fawn. Chuah lo le len loin inn lawng um a si tikah a chinchap lo ah bawlung puai vialte an thawn dih fawn hoi i, inn um hmanh cu to um sawhsawh khi a si ko cang. Nizan tihni kha a zohtu um lo bakin an chuihmi Manchester United le LASK(Austrian Bundesliga)an chuihmi ka zoh i ka ningtih a zual.😂Atulio ramthumnak Laimi caah cun pul a tlung lai bantuk, mangṭam a tlung lai bantuk, chun mui a tlung lai bantuk a si. Bawipa nih kan veng cio sehlaw, kan huppheng cio ko seh.

Be First to Comment

Leave a Reply

Your email address will not be published. Required fields are marked *