Press "Enter" to skip to content

Apoi Ko Mu Lainu Pakhat Cu Singapore Ah Van Sang In A Um Ko (+video)

Chinmi nungak pakhat Singapore ramchung ah sii-inn riantuan in um mi nu pakhat cu a umnak inn ngeitu nih kum 25 na tling rih lo caah kum tling lo na si ruangah Palik kan auh piak hna lai i kan tlaihter hna lai tiin a ti peng caah thinphang le awhlochong in khuachung ah a vakvai tiah theih a si. Khuachung a vak nak ah Kawl pawl nih an hmuh i biahalnak zong an tuah i, video hi an rak thlak mi cu a si.

Mah Chinnu hi zeitluk in dah thinphang le beidongh in a um hnga, mi ramdang khuachung ah passport lo le zeihmanh documents piah ding a ngei lo tik ah zaangfah tuk a si. Chinmi hi kan poi ko, mi khua le mi ram ah chungkhar pum cawmnak ruat in le kan ram harsattuk ruangah kan vakvai theo mi hi lungfah lo awk a tha lo. Mah nungak kong he pehtlaih in sii-inn rian a tuannak a boss te nih kum 25 na tling rih lo, palik kan auh hna lai i, kan i tlaih ter hna lai an ti peng caah palik nih tlaih ding tih in thinphang in khuachung ah a vakvai hi a si. Lai khuate lei in a rak ra mi a si tikah mi ram dang ah passport ngeilo le ken loin vak hi palik nih tlaih a si ti zong a theihthiam lo i, zaangfah tuk a si.

Mah nu chimhning ah cun a riantuan ning cu ngakchia sianginn ah va donh le va thlak a si. Cu tin palik an tlaihter ding a tihphang ruangah a umnak inn tlung ngam ti loin khuachung ah a vak vainak hi a si. Kawl pawl nih an hmuh i, cu tin an puaisa phone an chawnh piak. A riantuannak boss sin ah agency nih phone chawnh piak dingin an hal nain a boss techungkhar phone chawnh piah a duh lo. Asinain, a rak felnak pakhat cu a bay chungah cauk pakhat ah phone number pawl a rak tial dih. Singapore ram ah um midang pawl zong nih hi bantuk hi nan cawn thiam ding abiapi tuk hringhran. Agent phone number, hawikom bawmhchan kho tu dingin ruahmi phone number pawl cu zohlo in min chim khawh ding in ruah ding a si. Cu lo hmanh cauk te in tial in min tial chih ding.

Note; Kan ram harsatnak ruangah le pum pawcawmnak harsa ruangah kan Laimi mino tete pawl cu hmunkip le ramkip ah kan vakvai hna i, riantuan cio a si. A hleice in nungak pawl hi Singapore, Macau le China ram hna ah a kal mi an tam. Phungninglo in an kal tik ah kum tling lo pawl cu kum tling ti puaisa pawl nih an tuahpiak mi hna hi a tha lo taktak mi a si. Kum tling rih lomi pawl cu an khuaruahnak hrimhrim hi a pical rih lo caah harsatnak an tong taktak tik ah an tuar kho tawn lo. Mi ramdang ah harnak an tong tik ah anmah tein control theihlo ruangah pakhat khat an tuah sual lai ti phang a um ngaingai, Tiah thawnglatu Pakhat nih a phuan.

Video a tanglei ah kan van thil chih >>>>>>

Be First to Comment

Leave a Reply

Your email address will not be published. Required fields are marked *