SAC Ralkap Nih Rakhine Ram Chung Ah Minung 60 Hrawng An Tlaih Cang Hna!

SAC Ralkap Nih Rakhine Ram Chung Ah Minung 60 Hrawng An Tlaih Cang Hna!: SAC ralkap nih June thla le July thla chung ahkhan Sittwe Myauk U(စစ်တွေမြောက်ဦ), Kyauktaw(ကျောက်တော်), Minpia(မင်းပြား), Palatwah, Kyaukphyu(ကျောက်ဖြူ), Maungtaw(မောင်တော), Yatehtawng(ရသေ့တောင်) le Pungnakyun(ပုဏ္ဏားကျွန်း) khua hna in minung 60 hrawng cu an tlaih hna, tiah theih a si.

Tlaih a tongmi hna chung in minung 15 hrawng an thlah ṭhan hna. Tlaihkhih a tongmi hna cu ramchung buainak a chuahtertu an si tiah sualphawt in tazacuai mi zong an um i, tlaih ton hnu ah a tlaumi zong an um, tiah theih a si.

Atu bantuk in SAC ralkap nih hriamtlai phu he an buainak ruangah tualchung mi hna telhchih in tlaihkhihnak le tazacuainak a tuahmi hi an ngol a hau, tiah Rakhine nuhrin covo lei rianṭuantu phu in director U Myat Htun nih a chim.

“SAC ralkap nih an tlaih mi hna cu sualnak phunphun kawl in, sual an phawt hna. An Tlaih hna tikah ningcang lo in bia an chimter hna i, rallam sialnak hmun ah an i kalpi hna i ralphaw ah an hman hna. An tuahto hna ning cu nuhrin covo he aa kalh mi a si,” tiah a chim chap.

August 1 ah SAC ralkap nih Kyauktaw (ကျောက်တော်) khuami 3 an tlaih hna hnu in August 2 ah Arakan Army(AA) nih Maei(မအီ) peng hmunram uktu pakhat an tlaih ve caah kaphnih kar boruak a linsa ngai, tiah theih a si.