SAC Ralhrang Nih Sianghngakchia Tleirawl Tete An Tlaih Hna Ee! KNU Hmun Kahdohnak A Fak Caah Mipi Tam Tuk Lawmmam Nih An Umnak An Chuah Tak

yay Ah Siangngakchia 4 Tlaih An Tong!: Pago ramṭhen Pyay(ပြည်) ah kumtlinglo siangngakchia pa 4 cu July 19 ah SAC ralkap nih an tlaih hna, tiah Pyay khuami nih an chim. Pyay khuapi Sinsuh(ဆင်စု) sang ah siangngakchia pakhat le Pyont Hla Theinkone(ပွင့်လှသိမ်ကုန်း) sang siangngakchia 3 cu ni 19 zaanlei sang ah, SAC ralkap thazaang tampi an ra i an tlaih hna, tiah khuami pakhat nih RFA ah a chim.

Taang 7 tiang Sianginn a kai i aa din mi an si i kum 15,16 hrawng an si. An 4 in “Kaung For You” private sianginn i a kai mi an si caah SAC ralkap nih an tlaih hna. Cupinah Pyay khuachung i General Aung San statue pawng rawl dawr pakhat ah siangngakchia pakhat zong zaan ah an tlaih, tiah tualchung mi sin in theih a si.

Hi kong he pehtlai in SAC lei nih thawng an thanh mi a um rih lo. July 13 in 18 tiang (ni ruk chung) ah “Kuang For You” sianginn a dirhtu saya U Kaung Theih Soe(ဦးကောင်းသိုက်စိုး) le cachimtu minung 15 cu SAC ralkap nih an tlaih hna, tiah All Myanmar Federation of Teachers in chungtel pakhat nih RFA ah a chim.

KNU Hmunram Taungoo Pengkomh Ah Kahdohnak Ruangah Tualchung Mi 2,600 Leng An Zaam!: KNU brigade 2 hmunram Taungoo pengkomh Than Taunggyi(သံတောင်ကြီး) peng, Tapu(တာပူ) region chung i a ummi khuate 9 in tualchung mi 2,600 leng cu Tapu Kasho(တပူကရူ), Thide Kasho(ထီးဒေးကရူ), le Shanlaypin Kasho(ရှမ်းလယ်ပြင်ကရူ) ah an zaam hna, tiah KNU nih an thanh.

Tapu hmunram Min Lan Taung(မင်းလမ်းတောင်) khua, Si An Taung(ဆင်အံတောင်), Mi Ei Gyi(မိအိကြီး), Mi Ei Gyi Thitkone Suhsi(မိအိကြီးသစ်ကုန်းစုစည်း) khua, Kywekyaw(ကျွဲကျ) khua chak le khua thlang, Bawdikone(ဘောဓိကုန်း), Laytha(လယ်သာ), le Gwaytha(ဂွေးသဲ) lamṭhen hna ah SAC ralkap le KNLA cu July 15 in 18 tiang an i kap. SAC ralkap kah-lah-yiah 85(ခလရ ၈၅) le kah-mah-yiah 307(ခမရ ၃၀၇) nih khuate pawl cu hriamngan in an kah pinah inn zong an khangh hna, tiah KNU nih an langhter.

SAC ralkap nih khua an khangh ruang ah a zaam mi mizapi hna cu fur caan a si caah ṭhutdirnak kong ah siseh, eidin kong ah harsa ngai in an um, tiah KNU nih thawng an thanh. Credit; The Chin Post