R.I.P : Kalaymyo Ah SAC Ralkap Nih Mino Pa Pakhat An Kah Thah

Kalaymyo Ah SAC Ralkap Nih Mino Pa Pakhat An Kah Thah! Sagaing ramṭhen, Kalaymyo Sanmyo sang ummi No. 8 sianginn pawng ah a luancia August 8 zanlei ah, tlangval no kum 21 mi Lin Lin Naing cu cycle in an kal lio ah SAC ralkap nih an kah thah, tiah theih a si.

Lin Lin Naing cu zaan sml 7:00 hrawng ah a hawile inn ah riak ding in a kal lio ah SAC ralkap nih cun an kah, tiah theih a si. A chungkhar nih va zoh ding in an kal ko nain ralkap motor aa chawh lio a si caah caan tlawmpal an hngah. A ruak cu sii-inn ah an kalpi i, an inn lei an va chiah tiang zong ah cycle tluk sualnak a si, tiah a chungkhar nih cun an ruah.

Lin Lin Naing cu Kalaymyo ah kum 4 chung lumeh(barber) a cawn dih in Yangon ah pehzulh in lumeh a va cawng chap. Kalaymyo ah lumehnak dawr hun ding in aa zuam cuahmah lio a si i, lumehnak thilri zong aa cawk dih cang, tiah tualchung mi nih an chim. Credit : The Chin Post

Thawngpang dang relchap : August: Karenni Ramṭhen, Myawaddy Ah Phaisa Thlengtu Minung 5 Cu SAC Ralkap Nih An Tlaih Hna

Karenni ramṭhen, Myawaddy ah Thailand le Myanmar phaisa thlennak a tuahtu minung 5 cu SAC ralkap nih August ni 13 ah an tlaih hna, tiah theih a si. An tlaihmi hna chung ah a tam deuh cu Myawaddy no. 1 Chit Kyi Yae(ချစ်ကြည်ရေး) hlei pawng ah a um mi an si, tiah min langhter a duh lomi pakhat nih a chim.

Cu tlaihkhihnak ah cun Myawaddy sipin, palik le SAC ralkap hna an i tel, tiah theih a si. An tlaih hna nak a ruang bik cu Myanmar phaisa thlen rate nan tlakter tiin sual an puh hna, tiah khuami pakhat nih a chim.

Tlaih a tongmi hna chung hin phungning loin phaisa thlennak a tuahtu zong an i tel, phungning tein (license ngeimi) a thlengtu zong an tlaih ṭhiam hna, tiah a chim chap.

Thailand le Myanmar pehtlaihnak hmun pakhat a simi Myawaddy ah cun August ni 14 tiang ah Thailand phaisa Baht 1275 ah Kawlram phaisa Kyats 100,000 in an thlen, tiah theih a si. Nihin August ni 14 zong ah SAC ralkap thazaang 20 tluk nih checkhlatnak an tuah, tiah theih a si.

Yangon zong ah phaisa thlennak a tuahtu pawl cu SAC ralkap nih tlaih ding in an kawl len hna, tiah theih a si. Nihin Aug 14 phaisa an thlennak man cu; US $ 1 ah Kyats 3000, Thailand Baht 1 ah kyats 75 a si, tiah phaisa thlengtu hna nih an chim.a rel tu nan cung ah kan i lawm