Sagaing ramtthen Myinmu peng kahdohnak ah PGC hruaitu pakhat telh in pasalttha 8 nih ram le miphun caah nunnak an pek tiah theih a si. Aliamcia Hniang (August) 4 ni ah khan Myinmu peng ah mizapi ralkap le SAC ralhrang karlak kahdohnak a chuak i People’s Guerillas Commando – Myinmu phu in an hruaitu kum 50 upa cang mi pakhat le kum 20 hrawng mino tete 7 an nunnak a liam tiah theih a si.
Hniang 4 chunhnu ah kahdohnak a chuak, sml 1 chung hrawng an i kah cang hnu ah PGC ralkap minung 8 hna hi mi bawm ding in an hei cah hna ruangah Mawtaw in kahdohnak hmun lei ah cun an kal. Asinain a va phak deuh hlan ahhin mizapi ralkap pawl cu hnu ah an rak pil cang.
Thil sining fiang cu theih khawh mi cu a um ti lo. Asinain thil umtuning le SAC ralhrang nih ralphaw ah an hman mi hna chim ning ahcun: An va bawmh ding mi hna cu hnu an rak pil cang. Cu tikah an nih hi mawtaw in an si fawn tikah minung an i palh sual i SAC ralhrang pawl sin ahcun an va kal. Cu tikah an rak kah hna. An i kah ahhin cun PDF lei zong nih tlawmpal cu an kah manh ve ko hna tiah ralphaw an hman mi hna chung in a luat tthan mi nih an chim.
Nunnak a liam mi PDF pasalttha minung 8 cu an hawilei nih an va kawl tthan hna tikah a thaizing Hniang 5 ni ah mawtaw cungah mei in an rak khangh hna. A cheu cu a takpum a tling ti lo tiah Myinmu Civil Revolution Force nih an langhter.
Ralphaw ah an hman mi 15 chung ah minung 2 cu an thah hna nain a tang mi cu an thlah dih hna tiah an langhter chap.
Leave a Reply