Palaw Peng Kahdohnak Ah SAC Ralkap 10 Leng An Thi, Khua 10 Leng Ralzaam Dirhmun An Phan!: Tanintharyi ramṭhen Palaw peng ah June 27 in June 30 tiang SAC ralkap le tualchung hriamtlai phu kar pehtlai in kahdohnak a chuak, tiah Palaw peng tualchung hriamtlai phu nih nihin July 1 ah cathanh an chuah.
June 27 ah Palaw pengchung NanṬawng(နန်းတောင်) khua ah umhmun khuarmi SAC ralkap le Palaw PDF hna cu zaan suimilam 12:00 tiang an i kap tiah an cathanh ah cun an langhter. June 29 le June 30 ah Palaw pengchung MaGyiKung(မကျည်းကုန်း), KyawngNint(ကျောင်းနိမ့်), Hmawmih(မှော်မိ) khua le Palawkung(ပုလောကုန်း) khua ah faak ngai in kahdohnak a chuak tiah an langhter chih.
Kaphnih kar kahdohnak ah SAC ralkap lei 10 nak tlawm lo an thi i, Palaw tualchung hriamtlai phufonh lei in ralkap pakhat a nunnak a liam pinah 4 hliamhma an tuar, sinain an hliamhma ah thinphan ding a um lo tiah Palaw tualchung hriamtlai phu nih an thanh. Palaw pengchung kahdohnak ruangah khua 10 leng in khuami hna cu a himnak hmun ah kan zaam hna, tiah tualchung mi nih an chim.
Kahdohnak pehtlai in a chuah hnu in SAC ralkap nih tualchung mipi an zaamnak hmun riahcaw phorhnak lam an phihpiak hna caah, ralzaam dirhmun in a ummi hna cu harnak an tong, tiah ralzaam bawmchantu hna nih an chim. SAC ralkap lei nih Palaw peng kahdohnak kong ah cathanh chuahmi a um rih lo. Credit : The Chin Post
Leave a Reply