Khin-U peng ah SAC Ralkap Nih Helicopter 5 In Kahdohnak An Tuah!

Khin-U peng ah SAC Ralkap Nih Helicopter 5 In Kahdohnak An Tuah!: Sagaing ramṭhen Khin-U peng le Depeyin peng Ngawng Hlah(ညောင်လှ), Ma Yan Kan(မရန်ကန်), Yin Kyay(ယဉ်ကျေး) le Nama khua hna cu SAC ralkap nih helicopter in an kah hna caah mipi a thong reng lo cu ralzaam dirhmun an phan, tiah theih a si. Nihin July 14, chunhnu suimilam 1:40 luan in SAC ralkap nih Mi35 helicopter 5 hmang in cu khua hna cu an kah hna, tiah theih a si.

“Ralzaam umhmun khuarnak lei zong an kah hna i, Depeyin peng le Khin-U peng kar ah ummi khua hna cu an zaam dih,” tiah NgawngHlah(ညောင်လှ) khuami pakhat nih a chim. Kahdohnak ruangah thil a rawkralmi tampi a um lai nain thil sining fiang tein theih khawh a si rih lo,” tiah tualchung mi nih an chim.

Nihin July 14, zinglei suimilam 4:00 ah Yee-U in a chuakmi SAC ralkap hna cu Yee-U le Khin-U lampi ah Yee-U tualchung hriamtlai phufonh le Khin-U hriamtlai phu nih bomb an puahhnawh hna caah SAC ralkap 8 an thi, tiah theih a si.

Watlet Peng Ah Cozah Rianṭuantu 7 Nih CDM An Tuah!: Sagaing ramṭhen Watlet peng ah a luancia zarhhnih chung ahkhan Education department le uknak lei rianṭuantu minung 7 nih CDM an tuah, tiah Watlet peng tualchung hriamtlai phu le mizapi uknak lei rianṭuantu phu nih an chim. SAC ralkap kuttang um Cozah rianṭuantu hna nih cun CDM an tuahnak kong cu Watlet peng tualchung hriantlai phu sin ah thawng theihternak an tuah tiah mizapi uknak lei phu chungtel pakhat nih a chim.

Watlet pengchung SAC kuttang um department in CDM cawlcanghnak tuah duh ruangah pehtlaihnak a kan tuahmi an um, tiah a chimchap. Watlet peng fimcawnnak zung rianṭuantu 1800 hrawng chung ah minung 1400 leng nih CDM an tuah cang, tiah Watlet peng fimcawnnak zung rianṭuantu phu nih an chim. Credit : The Chin Post