Kawl Ralhrang Anmah Tein An I Kap, Minung 50 Hrawng Bak An Thi Ko Hih

SAC Ralkap Vanlawng Nih Hmunhma Aa Palh Caah Anmah Lei Ah Bomb A Thlak I Ralkap 50 Hrawng An Thi

Sagaing ramṭhen, Kata peng tiva kam ummi tilawng veng ding in Bant Bwe (ဘန့်ဘွေး) tlang ah umhmun a khuarmi SAC ralkap no.121 khah-lah-yiah cu nizaan August 22 zinglei ahkhan PDF nih an kah hna. Kahdohnak ah SAC ralkap lei bawm ding in aa thawhmi raltuknak vanlawng nih hmunhma aa palh caah anmah lei cu bomb a thlakhnawh sual hna i, SAC ralkap 50 hrawng an thi, tiah tualchung media nih an langhter.

Kata peng tualchung hriamtlai phu lei in ṭuanvo ngeitu pakhat nih cun, “SAC ralkap pawl hi sakhan an luh lio ah minung 58 an si nain, minung 6 lawng tilawng in an chuah ka hmuh. An i hngilh lio ah kan kah hna i, cu lio ah cun minung 58 an si, cu chung ah minung 6 lawng an chuak kho,” tiah a chim.

Fak ngai in hliamh a tongmi SAC ralkap hna bawmtu ding in raltuknak vanlawng 2 nih van lei in kahdohnak a tuah leng ah, hriamngan hmang in an rak kah bawmh ve hna nain anmah lei tu an kah hna, tiah an chim.Nizaan August 22, zinglei suimilam 5:00 in PDF nih SAC ralkap hna cu an va kah hna i, kaphnih kar kahdohnak suimilam 3 hrawng a chuak. Cu kahdohnak ah cun tualchung hriamtlai phu lei minung 4 hliamhma an tuar, tiah Kata peng tualchung hriamtlai Kata pah-kah-phah in ṭuanvo ngeitu nih a chim.