An Fim Tawl Bak Cang Tha : Facebook Ah Live Thlah In PDF A Hrocertu Pa Le A Nupi Thah An Tong!

Facebook Ah Live Thlah In PDF A Hrocertu Pa Le A Nupi Thah An Tong!: Nihin July 11 suimilam 12:00 hrawng ah Kalaymyo, Pinlung Lanmadaw(ပင်လုံလမ်းမတော်) kam, YaNanthTit(ရနံ့သစ်) lakphakti dawr ah a ṭhumi nupa hna cu hriamtlai phu pakhat nih an kah hna caah an thi, tiah Kalaymyo ummi pakhat nih Delta News Agency ah a chim. Thah a tongmi pa Sein Lin nih cun facebook ah live thlah in PDF a rak hrocer tawn hna, tiah tualchung mi nih an chim.

Tualchung mi pakhat nih cun, “Rawl kan ei lio ah meithal kah thawng voi 6 hrawng kan theih i, leng ah chuak in kan va zoh tikah YaNanthTit(ရနံ့သစ်) lakphakti dawr ah nupa pahnih cu meithal kah nak in an nunnak a rak liam,” tiah a chim.

Thah a tongmi Sein Lin nih cun SAC ralkap nih nawlngeihnak an laak hnu February, 2021 khan SAC ralkap uk duhlonak langhter in lamzawhtu hna thawng cu SAC ralkap sin ah a thanh tawn hna caah Kalaymyo, AungMinGalar sang in ṭhawl a rak tong bal, tiah Kalaymyo khuachung ummi pakhat nih a chim.

Tu zanlei tiang ah thah a tongmi nupa hna cu zei hriamtlai phu kut in thah an ton ti theih a si rih lo. Nupa hna thah an ton hnu caan rau lo te ah SAC ralkap hna cu an phan i, an ruak cu an kalpi hna. Chekhlatnak an tuah nain tlaihkhih a tongmi cu an um lo, tiah theih a si. Credit : The Chin Post

Be the first to comment

Leave a Reply

Your email address will not be published.


*