Breaking News: Russia President Putin Thah An Timh, A Thi Dengmang

Moscow September 16-2022: Russia President Putin cu thah nawn a timtu hna kut chung in a luat kho tiah Euro Weekly News nih Sept 15 ahkhan a tial. Thil a can ning cu mahti hin a si. Zeitik lio tak ahkhan dah thah an timh cu a si timi a caan cu an tial chih lo.

Putin nih aa ciitmi mawtaw a kehlei a ummi mawtaw cu a puak i, a kaang dih i, cu hnu cun meikhu lawng te a chuak. Asinain cukaa hmun cun Putin cu hmun himnak an kalpi manh i a luat, pakhat hmanh aa hliam lo ti ah an langhter. Cu kong he pehtlai in

President Putin cu hliamkhuai a tong lo nain minung tam taktak an tlaih hna ti a si. Putin cu a umnak inn lei a ttin lio ah mah thil a can hi a si tiah an langhter chap. Putin nih Ukraine a tukdoh a va chim hnu in amah pumpak ngandamnak le a nunnak thinphang dingin hroceernak tampi a tong tiah theih a si.

Atutiang ah President Putin hi a nunnak caah ttihnung mi hmun in thil voi 5 hrawng tiang a luat cang i, 2017 ahkhan vawleicung laar bikmi pakhat ah thim a rak si bal fawn.

Ralhrang nih Thantlang Remhţhannak Plan le ka Hmuhning

Tulio cu ralhrang bu nih Thantlang khua nupa aa timi pawl auh in “Thantlang remhţhannak/Serţhannak” kong ah tawnpumhnak an tuahpi hna timi cu Maivan cahmai a chilh. Mi tampi thinlung a ţap, lung a fak ing a puang, asinain zeiruang ahdah timi kan tuaktan lo tiah karuah. Thil pakhatkhat a chuah tikah a ruang le hmuitinh a um ţheo i cucu a biapi bik asi fawn. Cucahcun tutan ralhrang nih “Ţhantlang serţhannak” kongah tawnnak an tuahpi mihna ka hmuhning ka ţial. Thantlang serţhannak an timhbiknak a ruang tiah ka ruahmi cu….

  1. Kum khat chung a kalmi ramchung ral thawhnak ah a zualhma bikmi Kareni(ကယား) ramţhen, Sagaing(စစ်ကိုင်း) ramţhen le Chin ramţhen asi. Hihna lak ahhin Chin ramţhen cu anmah Kawl PDF he cawhpawlh loin CDF, CNA long bak he i kahdohnak le miphun miphun in i kahnak hmun asi tikah ramţhen luaknak lam a um kho bikmi/miphun in i ralnak a umkho bikmi asi(AA le KIA bantuk in). Cu pinah a khuapi in hrawhmi le tuksaphu(lu tan) thahnawnnak an tuahnak hmun asi i khuapi chungdah tilo khuate 90% cu Chin hriamtlai kut ah a umcangnak hmun asi caah.
  2. Tulio Thantlang ummi ralhrang hna khi leng chuak kholo in erh an sinak a sau cang i an thinlung a der/azaw cang, eidin le kuanzen an tlacham cang, pinah Furpi a sicang tikah harnak nih a dum canghna ticu a fian cang caah khihna him tein luatternak le chanhchuah khawhnak lam an kawl cang.
  3. Kumkhat chung kan ram mipi nih doh le kalh ansi tikah an Cozah sinak phungtling an sikho lo. Cozah tlaih an timhnak le sinak lampi a kalkho tilo. Ramleng ramchung sumdawnnak le chawlehnak a dir tuk tikah rampi ngunkhuai a um tuk tilo. Cu ngunkhuai a umlo nak nih ralhrang hna an thlahlawh, an hriamnak herhhai le eidin siiai zatawk a pe kho tihna loh. Cu nihcun anmah ralhrang chung lila lungdongh le hnu pilnak a chuahpi cang.

Hihna pinah a um pah len rih nain hivial in siseh law. Mah hna ruang ahhin ral tuk le ral kah nak in mipi tei le cozah sinak lam a um tilo pinah kan sung canglai ti an hngalh caah lemsawinak lam an kawl hi asi. Culak ahcun mah karkalak hui in pawcawm aa timmi cu umve hna kaw cuhna cu ralhrang nih an hriamnam caah hman in tutan tawnpumhnak an tuah hi asi tiah karuah.

Cucahcun Chin miphun le Chin hriamtlai bu hna nih kan i ruah le kan i timh ve ahau mi cu khi Thantlang khuachung ummi ralhrang khi ţhio dih zokzok le Thantlang khuapi ralhrang kut in luat ter le Thantlang peng pumpaluk khi Chin mi hriamtlai bu kut ah kan chiah khawh cang timi thanh khawh kan hau. Cu nihcun kan thinlung mersan a timtu ralhrang pawl lung kan tei hna lai i teinak puitling ah a kan kalpi lai. By Peng Hlawnceu

Be the first to comment

Leave a Reply

Your email address will not be published.


*