An Thah Khawh Cang Hih, Khuami Le Mipi Nih Akong An Ceih Peng Mi Sualpa An Thah Khawh Cang

Kalaymyo ah palik pakhat datsi a rawn lioah thah a tong. Sagaing ramṭhen, Kalaymyo, Tahan bazaar pawng chun sml 2:00pm hrawng ah mipi thuam in palik pakhat cycle datsi a rawn lioah meithal in kah a tong i a hmun ah a thi colh tiah theih a si.

Thah a tongmi hi Kalaymyo, Tahan sang ah a ummi riihai tlaihnak palik sakhaan in Sergeant San Htun a si tiah theih a si. Kahthahnak a chuah hnu ah SAC ralkap le palik pawl nih zohfelnak an tuah tiah theih a si. Tutan i an thah mi palik bawi hi cheukhat chimnak ah cun a sual taktak mi, mipi tlaih dingin a kuttang mi pawl he a vak lengmang mi asi tiah an chim.

Hmawbi Vanlawng Chiahnak Ah Bomb Hmanh A Si, Ralbawi Le Ralkap Zeimawzat Tlaih An Tong!: SAC ralkap nih raltuknak vanlawng an chiahnak Yangon, Hmawbi vanlawng chiahnak hmun cu June 28 zaanlei ah bomb hmanh a si nain a tlolh, tiah CDM ralkap Hlait Si nih a chim.

Kayin ramkulh Okarihṭa(ဥကရစ်ထ) camp a kaptu KNDO, KNLA le PDF hna cu SAC ralkap nih raltuknak vanlawng in pehzulh in an kah peng hna caah Hmawbi vanlawng chiahnak cu bomb puahhnawh ding in kan hmanhmi a si, tiah Mizapi ralkap Hlait Si nih cun a chimchap.

June 28 zaanlei ah khan Hmawbi vanlawng chiahnak hmun chung ah kan lut kho i, security an hngahnak kan pal khawh hnu ah Yark 130 raltuknak vanlawng 6 an chiahnak hmun ah bomb kan hmanh. June 29 zinglei suimilam 1:00 hrawng ah, cu hmun kan chuahtak khawh hnu ah a hlatnak in kan hmanhmi bomb cu puak ding in kan hmeh nain an puak lo, tiah mizapi ralkap Hlait Si nih cun a chim.

Vanlawng chiahnak hmun chung i bomb hmanh a si caah June 29 chun ah, vanlei ralkap(Air force) bawi le ralkap hna cu SAC ralkap security hngaktu nih an tlaih hna. Vanlei ralkap lutlaibik cu amah pumpak in Hmawbi vanlawng chiahnak ah, bomb hmanhnak kong hlathlatnak an tuah lio tiah theih a si.

“Nizaan chunhnu ah Hmawbi in ṬadaU(တံတားဦး) a phanmi cheukhat cu Y8 vanlawng he lakhruak in cunglei nih an auh hna i, YeGyiAi(ရေကြည်အိုင်) ah an kalpi hna. Hmawbi ummi zong an i tel, rallam sialnak hmun ah an kalpi hna, an phone zong an chuh hna,” tiah Hmawbi media nih a langhter.

Kyonphopin Sianginn I Ummi SAC Ralkap Bomb Thlakhnawh An Si I, 2 An Thi!: Sagaing ramṭhen, Ayadaw nitlak lei ah ummi Kyonphopin(ကျွန်းဖိုပင်) khua sianginn ah umhmun a khuar mi SAC ralkap cu nihin June 30 chunhnu Sml 2:15 ah tualchung PDF nih drone in bomb an thlakhnawh hna i, ralkap 2 an thih lengah 3 hliam an tuar, tiah Zero pyohcia phu nih an thanh.

Sianginn i ummi SAC ralkap hna nih cun an pawngkam lam a pal mi khualtlawng le mawṭaw hna dirter in hramhram in phaisa an hal tawn hna ruangah an doh hnanak a si, tiah theih a si. Cu kahdohnak cu Zero pyohcia(Myinmu), ZERO POWER(Sagaing), Danger Force ṭangrual phu i bawn in an tuah mi a si, tiah theih a si.

Be the first to comment

Leave a Reply

Your email address will not be published.


*