ThawngPang Tha: Pauk Peng, Chaingzauk Khua Inn 40 Renglo SAC Ralkap Nih An Khangh!

ThawngPang Tha: Pauk Peng, Chaingzauk Khua Inn 40 Renglo SAC Ralkap Nih An Khangh!

Magway ramṭhen, Pauk peng, Chaingzauk(ချိုင်ဇောက်) khua cu nihin August 16 zinglei ah SAC ralkap nih an khangh caah inn 40 hrawng a kaang, tiah tualchung mi nih an chim.

Minung thazaang 100 leng he rallam sialtu SAC ralkap hna nih August 15 zaanlei ah Chaingzauk(ချိုင်ဇောက်) khua cu luhhnawh in phungki sianginn ah umhmun an khuar. Nihin August 16 zinglei ah cu ralkap hna nih cun inn an khangh, tiah Chaingzauk(ချိုင်ဇောက်) khuami pakhat nih a chim.

Khuami pakhat nih cun, “Inn 400 hrawng khuasaknak ah SAC ralkap nih inn 40 hrawng cu an khangh leng ah Chaingzauk(ချိုင်ဇောက်) khua pawngkam zong ah inn an khangh, inn zeizat an khangh bel fehter awk a ṭha rih lo,” tiah a chim.

Nizaan August 15 ah SAC ralkap le tualchung hriamtlai phu hna cu Chaingzauk(ချိုင်ဇောက်) khua pawng ah an i kap, tiah khuami nih an chim. SAC ralkap hna nih rallam an sial ti kan theih cangka in a himnak hmun ah kan zaam dih hna, tiah an chim chap.

Magway ramṭhen chung ah SAC ralkap nih February 1 in May 31 tiang ah inn 3,055 an khangh. Rampi huap in SAC ralkap nih an khanghmi inn dihlak hi inn 18,886 a si cang, tiah Data For Myanmar nih June 7 ah a rak thanh.

Be the first to comment

Leave a Reply

Your email address will not be published.


*